حیدرآباد: سندھ ہائی کورٹ نے کوٹری بیراج کے قریب دریائے سندھ میں آلودگی روکنے کے لیے جامع اور قابلِ عمل اقدامات نہ کرنے پر صوبائی حکام سے سخت برہمی کا اظہار کیا ہے۔ عدالت نے ایڈیشنل رجسٹرار کو ہدایت کی ہے کہ وہ متعلقہ محکموں کے نمائندوں کے ہمراہ متاثرہ مقام کا تفصیلی معائنہ کریں، تصاویر اور ویڈیو ریکارڈ تیار کریں اور ایک ہفتے کے اندر رپورٹ عدالت میں جمع کرائیں۔ عدالت نے واضح کیا کہ دریائے سندھ اور کوٹری بیراج کے اطراف آلودگی کی اجازت کسی صورت نہیں دی جا سکتی۔
دو رکنی بینچ جسٹس عدنان الکریم میمن اور جسٹس محمد جعفر رضا پر مشتمل تھا۔ سماعت کے دوران عدالت نے کہا کہ پہلے دی گئی ہدایات کے باوجود متعلقہ ادارے ایسا جامع حقائق پر مبنی منصوبہ پیش نہیں کر سکے جس میں پانی کے سائنسی تجزیے، آلودگی کے ذرائع کی نشاندہی، مشترکہ معائنے، موجودہ ٹریٹمنٹ پلانٹس کی حالت اور مقررہ مدت میں اصلاحی اقدامات کی تفصیل موجود ہو۔ عدالت نے اس معاملے کو عوامی صحت، ماحول کے تحفظ اور شہریوں کے بنیادی حقوق سے براہِ راست متعلق قرار دیا۔
عدالت کی ہدایت کے مطابق معائنے میں سندھ انوائرنمنٹل پروٹیکشن ایجنسی، حیدرآباد واٹر اینڈ سیوریج کارپوریشن، محکمہ پبلک ہیلتھ انجینئرنگ، حیدرآباد میونسپل کارپوریشن اور دیگر متعلقہ اداروں کے سربراہان یا نمائندے تعاون کریں گے۔ انہیں تمام متعلقہ ریکارڈ اور تکنیکی معاونت بھی فراہم کرنا ہوگی تاکہ رپورٹ محض رسمی کارروائی نہ رہے بلکہ موقع کی حقیقی صورتِ حال سامنے آ سکے۔
عدالت نے آلودگی کے ممکنہ ذرائع کی نشاندہی کے لیے اپ اسٹریم اور ڈاؤن اسٹریم مقامات سے پانی کے نمونے جمع کرکے کسی تسلیم شدہ لیبارٹری سے ان کے جسمانی، کیمیائی اور جراثیمی اجزا کی جانچ کرانے کی ہدایت بھی دی۔ متعلقہ اداروں کو کہا گیا ہے کہ وہ شہری نالوں، صنعتی اخراج، اسپتالوں کے فضلے اور دیگر ایسے مقامات کی فہرست تیار کریں جہاں سے غیر علاج شدہ گندا پانی یا فضلہ دریائے سندھ یا اس سے منسلک آبی گزرگاہوں میں شامل ہو سکتا ہے۔
سندھ انوائرنمنٹل پروٹیکشن ایجنسی اور متعلقہ محکموں کو مشتبہ صنعتی یونٹس، اسپتالوں، میونسپل نالوں اور سیوریج ٹریٹمنٹ سہولتوں کا مشترکہ معائنہ کرکے غیر قانونی اخراج کے ذمہ دار اداروں کی نشاندہی کرنا ہوگی۔ محکمہ پبلک ہیلتھ انجینئرنگ اور بلدیاتی اداروں سے موجودہ نکاسی و گندے پانی کی صفائی کے نظام، ان کی عملی حالت، خامیوں اور مرمت یا بہتری کے لیے درکار اقدامات کی تفصیل بھی طلب کی گئی ہے۔
عدالت نے حکم دیا کہ جہاں ماحولیاتی معیار کی خلاف ورزی سامنے آئے وہاں قانون کے مطابق نوٹس اور ہدایات جاری کی جائیں اور مزید آلودگی روکنے کے لیے فوری حفاظتی اقدامات کیے جائیں۔ رپورٹ میں پہلے سے کیے گئے اقدامات، باقی کام کی مدت، مالی ضروریات، ذمہ دار محکموں، لیبارٹری نتائج، معائنے کی تصاویر، نقشوں اور دستاویزی شواہد کو شامل کرنا ہوگا۔ عدالت نے سماعت 25 نومبر تک ملتوی کرتے ہوئے واضح کیا کہ ادارے مزید عدالتی حکم کا انتظار کیے بغیر اپنی قانونی ذمہ داریاں پوری کریں۔
