اسلام آباد: سپریم کورٹ آف پاکستان نے وراثتی حقوق سے متعلق مقدمات میں مدتِ معیاد کے اطلاق پر موجود عدالتی اختلافات ختم کرتے ہوئے واضح کیا ہے کہ کسی وارث کے حصے کے دعوے میں چھ سال کی قانونی مدت محض غلط ریونیو انتقال درج ہونے، خاموشی اختیار کیے جانے یا وقت گزرنے سے شروع نہیں ہوتی۔ یہ مدت اس وقت سے شمار ہوگی جب مدعا علیہ ثابت کرے کہ دعویٰ کرنے والے وارث کو اپنے حق سے انکار یا اسے محروم کرنے کے کسی واضح اقدام کا علم ہو چکا تھا، یا حالات کے مطابق اسے اس کا علم ہونا چاہیے تھا۔
جسٹس شاہد وحید کی سربراہی میں پانچ رکنی لارجر بینچ نے متفقہ فیصلے میں وراثتی حصے کے دعووں اور ایسے دستاویزات کو منسوخ کرانے کے مقدمات کے درمیان فرق بھی واضح کیا جن پر وارث خود فریق یا دستخط کنندہ رہا ہو۔ فیصلے کے مطابق اگر کوئی وارث ایسی دستاویز منسوخ کرانا چاہے جس میں وہ خود فریق تھا تو متعلقہ دعوے پر تین سال کی مدت لاگو ہو سکتی ہے، بشرطیکہ مدعا علیہ یہ ثابت کرے کہ وارث کو منسوخی کی بنیاد کا علم تین سال سے زیادہ پہلے ہو گیا تھا۔ عدالت نے واضح کیا کہ وراثت کا حق مورث کی وفات کے وقت وارث کو منتقل ہو جاتا ہے اور محض وقت گزرنے سے اس حق کی اصل بنیاد ختم نہیں ہوتی۔
عدالت نے صوبائی ریونیو حکام کو ہدایت کی کہ کسی بھی انتقالِ وراثت کی تصدیق سے پہلے نادرا کا فیملی رجسٹریشن ریکارڈ یا تمام قانونی وارثوں کی شناخت کا مساوی مستند ثبوت حاصل کیا جائے۔ ریکارڈ میں درج ہر وارث کو اس کے پتے پر تحریری نوٹس بھیجا جائے، جس میں خواتین وارثوں کو بھی شامل کیا جائے۔ اگر کسی وارث کے حصے سے دستبرداری، تحفہ، فروخت یا تصفیے کا معاملہ ہو تو ریونیو افسر اس کی ذاتی حاضری، شناخت اور اس بات کی تصدیق ریکارڈ کرے کہ اسے اپنے درست حصے سے آگاہ کر دیا گیا ہے۔ جہاں دستیاب ہو، خاتون وارث کے معاملے میں یہ کارروائی خاتون ریونیو افسر کی موجودگی میں کی جائے۔
سپریم کورٹ نے مزید قرار دیا کہ رجسٹریشن اتھارٹیز، ترقیاتی ادارے، کنٹونمنٹ بورڈز اور کوآپریٹو ہاؤسنگ سوسائٹیز وراثتی جائیداد کی منتقلی اس وقت تک نہ کریں جب تک جانشینی سرٹیفکیٹ، خطوطِ انتظامیہ یا عدالت کا حکم موجود نہ ہو اور تمام وارثوں کو تحریری اطلاع نہ دی گئی ہو۔ عدالت نے ٹرائل کورٹس کو بھی کہا کہ جب کسی مقدمے میں مدتِ معیاد کا اعتراض اٹھایا جائے تو اسے محض تکنیکی بنیاد پر نمٹانے کے بجائے شواہد کی روشنی میں طے کیا جائے۔
فیصلے میں قانون ساز اداروں اور لا اینڈ جسٹس کمیشن کو سفارش کی گئی کہ وراثتی حصے سے دستبرداری صرف باقاعدہ تحریری اور رجسٹرڈ دستاویز کے ذریعے ہو، اور دستخط سے پہلے وارث کو اس کے اصل حصے کی وضاحت کی جائے۔ عدالت نے وراثت سے دھوکے یا غیر قانونی طریقے سے محروم کرنے کو قابلِ سزا بنانے کے لیے قانون میں ترمیم پر بھی غور کرنے کا کہا۔ یہ فیصلہ خاص طور پر ان خاندانوں کے لیے اہم ہے جہاں خواتین یا دیگر وارثوں کو جائیداد کے ریکارڈ سے خارج کر دیا جاتا ہے۔