لندن، 11 نومبر — برطانوی پولیس نے بدھ کو نیٹو کے لیے تعینات ایک امریکی فوجی سے روس کے لیے مبینہ جاسوسی کے معاملے میں پوچھ گچھ کی۔ ڈان کے مطابق برطانوی انسداد دہشت گردی پولیس نے کہا کہ 41 سالہ امریکی فوجی کو جنوب مغربی انگلینڈ میں گلوسٹر کے قریب قومی سلامتی کے قوانین کی خلاف ورزی کے شبہے میں گرفتار کیا گیا۔ گرفتاری کے بعد اسے لندن کے ایک پولیس اسٹیشن منتقل کیا گیا۔
نیٹو کے ایک سینئر فوجی عہدیدار نے منگل کو تصدیق کی کہ فوجی اتحاد کی الائیڈ ریپڈ ری ایکشن کور کے لیے تعینات تھا۔ برطانوی فوج کی قیادت میں کام کرنے والی اس فورس میں 20 ممالک شامل ہیں۔ اس کا اڈا گلوسٹر کے قریب امجن بیرکس میں ہے اور اسے ضرورت پڑنے پر یورپ اور دوسرے خطوں میں مختصر نوٹس پر تعینات کیا جا سکتا ہے۔
پولیس کے مطابق گرفتاری قومی سلامتی کے قانون کی دو دفعات کے تحت عمل میں آئی۔ ایک دفعہ محفوظ معلومات حاصل کرنے یا ظاہر کرنے اور دوسری غیر ملکی انٹیلی جنس سروس کی معاونت سے متعلق ہے۔ اس قانون کے تحت کسی شخص کو فرد جرم عائد کیے بغیر 14 روز تک حراست میں رکھنے کی گنجائش ہے۔ حکام نے کہا کہ مبینہ معاملہ روس سے متعلق ہے اور گلوسٹرشائر میں دو مقامات کی تلاشی لی جا رہی ہے۔
برطانوی انسداد دہشت گردی پولیس کی سینئر رابطہ کار وکی ایونز کے مطابق تحقیقات برطانوی اور امریکی اداروں کے تعاون سے ہو رہی ہیں۔ امریکی ایف بی آئی کے ڈائریکٹر کاش پٹیل نے دونوں ملکوں کے حکام کی کوششوں کا ذکر کیا۔ دوسری جانب روسی حکومت کے ترجمان دمتری پیسکوف نے کہا کہ گرفتاری سے ماسکو کا کوئی تعلق نہیں۔ پولیس کے مطابق تفتیش بدھ کو جاری تھی۔