بیجنگ: چین کی فیکٹری سرگرمی اکتوبر 2026 میں دوبارہ سکڑ گئی، جس سے دنیا کی دوسری بڑی معیشت میں کمزور داخلی طلب اور برآمدی آرڈرز کی رفتار میں کمی کے اثرات نمایاں ہوئے ہیں۔ چین کے قومی ادارہ شماریات کے جاری کردہ اعداد و شمار کے مطابق سرکاری مینوفیکچرنگ پرچیزنگ منیجرز انڈیکس (پی ایم آئی) ستمبر کے 50.1 سے کم ہو کر اکتوبر میں 49.3 رہ گیا۔ 50 سے کم ریڈنگ صنعتی سرگرمی میں سکڑاؤ جبکہ اس سے زیادہ ریڈنگ توسیع کو ظاہر کرتی ہے۔
رائٹرز کے مطابق اکتوبر کی ریڈنگ ماہرین کے سروے میں متوقع 50.0 سے بھی کم رہی اور یہ چار ماہ کے دوران تیسرا مہینہ ہے جس میں مینوفیکچرنگ سرگرمی سکڑاؤ کے زون میں رہی۔ رپورٹ میں کہا گیا کہ ستمبر میں کرسمس سیزن سے متعلق بیرونی آرڈرز پہلے ہی بڑی مقدار میں موصول ہونے کے بعد اکتوبر میں برآمدی طلب کی رفتار کم ہوئی، جبکہ قومی دن کی تعطیلات کے بعد صارفین کے اخراجات میں آنے والی تیزی بھی برقرار نہ رہ سکی۔
سرکاری سروے کے ذیلی اشاریوں میں مجموعی نئے آرڈرز اور نئے برآمدی آرڈرز دونوں سکڑاؤ کی سطح پر رہے۔ پیداوار اور خریداری کی سرگرمی بھی گزشتہ ماہ کی توسیع سے نیچے آ گئی۔ اسی دوران خدمات اور تعمیرات کا احاطہ کرنے والا نان مینوفیکچرنگ پی ایم آئی ستمبر کے 50.2 سے کم ہو کر 49.7 ہو گیا، جس سے وسیع تر کاروباری سرگرمی پر دباؤ کا اشارہ ملا۔
تاہم تمام صنعتی شعبوں کی کارکردگی یکساں نہیں رہی۔ ریلوے، جہاز سازی، ایرو اسپیس آلات اور کمپیوٹر، مواصلات و الیکٹرانکس سے متعلق صنعتوں کے پیداوار اور نئے آرڈرز کے بعض اشاریے 53 یا اس سے اوپر رہے۔ مصنوعی ذہانت سے منسلک کچھ کمپنیوں نے بھی مضبوط منافع رپورٹ کیا، جبکہ روایتی مینوفیکچرنگ اور پراپرٹی سے جڑی صنعتوں کو کمزور مقامی طلب اور بڑھتی لاگت کا سامنا رہا۔
اقتصادی ماہرین نے خبردار کیا ہے کہ اگر 2027 میں بیرونی طلب مزید کمزور ہوئی تو بیجنگ کو داخلی طلب مضبوط کرنے کے لیے اضافی پالیسی مدد دینا پڑ سکتی ہے۔ بعض ماہرین نے گھریلو اعتماد بہتر بنانے کے لیے رہن کے سود پر سبسڈی اور سرمایہ کاری منصوبوں کے قرضوں کی لاگت کم کرنے جیسے اقدامات کی تجویز دی ہے۔ اس کے باوجود موجودہ اندازوں کے مطابق چین سالانہ 4.5 سے 5 فیصد کے سرکاری شرح نمو کے ہدف کے قریب رہ سکتا ہے، خصوصاً تیسری سہ ماہی میں اقتصادی نمو 4.5 فیصد تک بہتر ہونے کے بعد۔