تاشقند: پاکستان کی خواتین ہینڈبال ٹیم نے انٹرنیشنل ہینڈبال فیڈریشن ویمنز نیشنز ٹرافی ایشیا زون تھری میں کانسی کا تمغہ حاصل کر لیا۔ ازبکستان کے دارالحکومت تاشقند میں 13 سے 17 اکتوبر تک ہونے والے پانچ ملکی ٹورنامنٹ میں پاکستانی ٹیم نے دو میچ جیتے اور دو میں شکست کے بعد مجموعی طور پر تیسری پوزیشن حاصل کی۔
پاکستان نے مہم کا آغاز 13 اکتوبر کو ترکمانستان کے خلاف کیا، جہاں اسے 38-19 سے شکست ہوئی۔ اگلے روز میزبان ازبکستان نے پاکستان کو 46-8 سے ہرایا۔ ابتدائی دو ناکامیوں کے بعد قومی ٹیم نے واپسی کی اور 15 اکتوبر کو تاجکستان کو 36-14 سے شکست دی۔ اس میچ میں کپتان سحرش کو پلیئر آف دی میچ قرار دیا گیا۔
پاکستان نے 17 اکتوبر کو اپنے آخری میچ میں کرغزستان کے خلاف 33-23 سے کامیابی حاصل کی۔ اس مقابلے میں مصباح نے نمایاں کارکردگی دکھائی اور پلیئر آف دی میچ کا اعزاز حاصل کیا۔ دو کامیابیوں اور دو شکستوں کے نتیجے میں پاکستان نے کرغزستان اور تاجکستان سے بہتر پوزیشن حاصل کرتے ہوئے کانسی کا تمغہ اپنے نام کیا۔
میزبان ازبکستان نے چاروں میچ جیت کر ٹائٹل حاصل کیا جبکہ ترکمانستان تین فتوحات کے ساتھ دوسرے نمبر پر رہا۔ ازبکستان نے اس کامیابی کے ساتھ 2026 اے ایچ ایف ایشین ویمنز ہینڈبال چیمپئن شپ میں بھی جگہ بنائی، جو نومبر کے آخر اور دسمبر کے آغاز میں قازقستان میں شیڈول ہے۔
پاکستان ہینڈبال فیڈریشن کے صدر محمد شفیق نے نتیجے کو حوصلہ افزا قرار دیتے ہوئے کہا کہ سینئر خواتین ٹیم سات سال بعد کسی بین الاقوامی ٹورنامنٹ میں شریک ہوئی۔ ان کے مطابق ٹیم کو مختصر تربیتی مدت اور محدود سہولیات جیسے مسائل کا سامنا تھا۔ پاکستانی خواتین کی سینئر ٹیم نے اس سے قبل 2019 کے نیپال ساؤتھ ایشین گیمز میں بین الاقوامی سطح پر شرکت کی تھی۔ طویل وقفے کے بعد تاشقند میں حاصل ہونے والا تمغہ ٹیم کے لیے دوبارہ بین الاقوامی مسابقت میں قدم جمانے کی اہم پیش رفت ہے، اگرچہ ایشیائی سطح پر مزید مضبوط حریفوں کے مقابلے کے لیے مسلسل تربیت اور میچ ایکسپوژر کی ضرورت برقرار رہے گی۔
