اسلام آباد: اقوام متحدہ کے سیکریٹری جنرل انتونیو گوتریس منگل کی صبح پاکستان کے سرکاری دورے پر اسلام آباد پہنچ گئے۔ دفتر خارجہ کے مطابق قائم مقام سیکریٹری خارجہ سفیر نبیل منیر نے ان کا استقبال کیا۔ گوتریس نائب وزیراعظم اور وزیر خارجہ اسحاق ڈار کی دعوت پر پاکستان آئے ہیں اور ان کے قیام کے دوران پاکستان اور اقوام متحدہ کے درمیان تعاون، علاقائی و عالمی صورتحال اور کثیرالجہتی سفارت کاری سے متعلق امور زیر بحث آئیں گے۔
دفتر خارجہ کی جانب سے جاری پروگرام کے مطابق اقوام متحدہ کے سربراہ صدر آصف علی زرداری، وزیراعظم شہباز شریف، نائب وزیراعظم و وزیر خارجہ اسحاق ڈار اور چیف آف ڈیفنس فورسز و چیف آف آرمی اسٹاف فیلڈ مارشل عاصم منیر سے ملاقاتیں کریں گے۔ ان ملاقاتوں میں بین الاقوامی امن و سلامتی، خطے کی صورتحال اور اقوام متحدہ کے ساتھ پاکستان کے دیرینہ تعلقات پر تبادلہ خیال متوقع ہے۔
گوتریس کا دورہ ایسے وقت ہو رہا ہے جب ان کی دس سالہ مدت بطور سیکریٹری جنرل رواں سال 31 دسمبر کو مکمل ہونے والی ہے۔ دفتر خارجہ کے مطابق دورے کے دوران پاکستان کی جانب سے کثیرالجہتی نظام کو مضبوط بنانے، عالمی امن و سلامتی میں کردار اور آفات سے نمٹنے کی تیاریوں کو بھی اجاگر کیا جائے گا۔
اقوام متحدہ کے سیکریٹری جنرل اقوام متحدہ کے فوجی مبصر گروپ برائے بھارت و پاکستان کے ہیڈکوارٹرز کا دورہ بھی کریں گے۔ اس کے علاوہ نیشنل ڈیزاسٹر مینجمنٹ اتھارٹی کے ہیڈکوارٹرز میں انہیں پاکستان کی آفات سے نمٹنے کی صلاحیت، پیشگی انتباہی نظام اور متعلقہ انتظامات پر بریفنگ دی جائے گی۔
وزیراعظم شہباز شریف نے گزشتہ ماہ نیویارک میں اقوام متحدہ کی جنرل اسمبلی کے موقع پر بھی گوتریس سے ملاقات کی تھی، جس میں مشرق وسطیٰ سمیت اہم علاقائی اور بین الاقوامی امور پر گفتگو ہوئی تھی۔ دفتر خارجہ کے مطابق اس ملاقات میں اقوام متحدہ کے سربراہ نے عالمی ادارے میں پاکستان کے کردار اور بین الاقوامی امن و سلامتی کے لیے اس کی خدمات کو سراہا تھا۔ موجودہ دورہ دونوں فریقوں کو انہی موضوعات پر مزید تفصیلی بات چیت کا موقع فراہم کرے گا۔