چینی وزارتِ تجارت نے قومی سلامتی اور حساس استعمال کے خدشات کا حوالہ دیتے ہوئے سولر آلات بنانے میں استعمال ہونے والی 12 جدید ٹیکنالوجیز کو برآمدی کنٹرول فہرست میں شامل کرنے کی تجویز پیش کی ہے۔ رائٹرز کے مطابق مجوزہ فہرست میں باریک ویفرز، پیرووسکائٹ اور ٹینڈم سولر سیلز اور بڑے پیمانے پر فلوئڈائزڈ بیڈ پولی سلیکون پیداوار جیسی ٹیکنالوجیز شامل ہیں۔ بعض ٹیکنالوجیز پر مکمل پابندی تجویز کی گئی ہے جبکہ TOPCon، HJT اور XBC جیسی جدید سیل ٹیکنالوجیز کو محدود اور لائسنس کے تابع رکھنے کی تجویز ہے۔ وزارت نے کہا ہے کہ اس اقدام کا مقصد حساس شعبوں میں ٹیکنالوجی کے غلط استعمال کے خطرات کم کرنا ہے، برآمد کنندگان کو کچھ بیرونِ ملک منتقلیوں کا اندراج کرانا ہوگا، اور حتمی فہرست سے پہلے عوامی مشاورت 15 نومبر تک جاری رہے گی۔ یہ اقدامات چینی حکام کی ایک وسیع تر اسٹریٹجک ٹیکنالوجی برآمدی جائزہ پالیسی کے حصہ کے طور پر سامنے آئے ہیں، اور چونکہ چین عالمی سولر سپلائی چین میں مرکزی ہے تو اس کے اثرات عالمی پیداوار پر پڑ سکتے ہیں۔
