نیشنل سائبر ایمرجنسی رسپانس ٹیم (این سی ای آر ٹی) نے اکتوبر میں متعدد مشتبہ فشنگ ڈومینز کی نشاندہی کیں جو نادرا، ایف بی آر، ہائر ایجوکیشن کمیشن، پی ٹی اے، ایف آئی اے، سکیورٹیز اینڈ ایکسچینج کمیشن، بے نظیر انکم سپورٹ پروگرام، وزیراعظم یوتھ پروگرام اور پنجاب سیف سٹیز سمیت مختلف سرکاری اداروں کے نام یا شناخت سے مشابہت رکھتی ہیں۔ این سی ای آر ٹی کے تھریٹ انٹیلی جنس سینٹر نے یہ سرگرمیاں 4 اکتوبر کو فعال حالت میں نوٹ کیں اور ان ڈومینز کی نگرانی جاری رکھی۔ ادارے نے شہریوں کو غیر مصدقہ لنکس پر ذاتی یا لاگ اِن معلومات فراہم نہ کرنے، ویب ایڈریس کی جانچ کرنے اور مشتبہ سرگرمی رپورٹ کرنے کی ہدایات جاری کیں۔ این سی ای آر ٹی نے جنریٹو اے آئی کے غیر مجاز استعمال سے متعلق خطرات اور اداروں کے لیے منظور شدہ اے آئی ٹولز کی فہرست برقرار رکھنے، شواہد محفوظ کرنے اور متاثرہ اسناد منسوخ کرنے کی احتیاطی تجاویز بھی دی ہیں۔
