سندھ حکومت نے صوبے میں تعمیر کی جا رہی جدید فرانزک سائنس لیبارٹری کو دسمبر 2026 تک مکمل طور پر فعال کرنے کا ہدف مقرر کیا ہے۔ سندھ اسمبلی کی قائمہ کمیٹی برائے داخلہ کے اجلاس میں عمارت کی تعمیر کے آخری مراحل، ڈی این اے، حیاتیاتی، فنگر پرنٹ، منشیات، بیلسٹکس، جائے وقوعہ اور ڈیجیٹل فرانزکس سمیت متعدد سائنسی شعبوں میں خدمات کی فراہمی، آلات کی خریداری، ماہر عملے کی بھرتی و تربیت، معیار کی یقین دہانی اور بین الاقوامی ایکریڈیٹیشن کے لیے مرحلہ وار روڈ میپ پر غور کیا گیا۔ اجلاس میں پراسیکیوشن سروس کی ڈیجیٹلائزیشن اور 'پراسیکیوشن کیس مینجمنٹ سسٹم' پر بھی بریفنگ دی گئی جس کا مقصد مقدمات کی ڈیجیٹل نگرانی اور اداروں کے درمیان رابطہ بہتر بنانا ہے۔
