اقوام متحدہ کے سیکریٹری جنرل انتونیو گوتریس 6 اکتوبر 2026 کو سرکاری دورے پر اسلام آباد پہنچ گئے۔ دفتر خارجہ کے مطابق وہ نائب وزیراعظم و وزیر خارجہ اسحاق ڈار کی دعوت پر آئے ہیں اور دورے کے دوران صدر آصف علی زرداری، وزیراعظم شہباز شریف، نائب وزیراعظم و وزیر خارجہ اسحاق ڈار اور عسکری قیادت بشمول چیف آف ڈیفنس فورسز و چیف آف آرمی اسٹاف فیلڈ مارشل عاصم منیر سے ملاقاتیں کریں گے۔ گوتریس پاکستان اور اقوام متحدہ کے درمیان تعاون، علاقائی و عالمی صورتحال، کثیرالجہتی سفارتکاری، بین الاقوامی امن و سلامتی اور آفات سے نمٹنے کی تیاریوں پر تبادلۂ خیال کریں گے۔ وہ اقوام متحدہ کے فوجی مبصر گروپ برائے بھارت و پاکستان کے ہیڈکوارٹرز اور نیشنل ڈیزاسٹر مینجمنٹ اتھارٹی کے ہیڈکوارٹرز کا بھی دورہ کریں گے۔ گوتریس کی بطور سیکریٹری جنرل دس سالہ مدت اس سال 31 دسمبر کو مکمل ہو رہی ہے۔
