وفاقی وزیر خزانہ و محصولات سینیٹر محمد اورنگزیب کی زیر صدارت رسائی بہ مالیات اسٹیئرنگ کمیٹی کے چھٹے اجلاس میں چھوٹے اور درمیانے کاروبار، زراعت، ہاؤسنگ، برآمدات اور حکومتی قرض اسکیموں میں پیش رفت کا جائزہ لیا گیا۔ کمیٹی نے کہا کہ مالیاتی رسائی میں توسیع کا نتیجہ کاروباروں، کسانوں اور کم سہولت یافتہ طبقات کے لیے عملی فائدے کی صورت میں سامنے آنا چاہیے۔
اجلاس کو بتایا گیا کہ 23 اکتوبر 2026 تک ایس ایم ای شعبے میں بقایا فنانسنگ 1.148 ٹریلین روپے تک پہنچ گئی، جس میں چھوٹے کاروباروں کے لیے 538 ارب روپے شامل ہیں۔ کمیٹی نے سمیڈا کے صلاحیت سازی روڈ میپ کا بھی جائزہ لیا، جس میں مالیاتی خواندگی، بہتر دستاویزات، اکاؤنٹنگ سپورٹ اور ڈیجیٹل ٹولز کے ذریعے کاروباروں کو رسمی قرض کے لیے تیار کرنے پر توجہ دی گئی ہے۔
زرعی فنانسنگ کے بارے میں بتایا گیا کہ بقایا قرض 1.329 ٹریلین روپے اور قرض لینے والوں کی تعداد تقریباً 35 لاکھ ہے۔ وزیراعظم کی زرخیز ای آسان زرعی قرضہ اسکیم کے تحت 20 ہزار 176 درخواستیں، جن کی مالیت 8.674 ارب روپے تھی، منظور ہو چکی ہیں، جبکہ چھوٹے کسانوں کو 6 ہزار 132 بغیر ضمانت قرضوں کی مد میں تقریباً 2.34 ارب روپے جاری کیے گئے۔
ہاؤسنگ فنانس میں بقایا قرض 455 ارب روپے بتایا گیا، جس سے 2 لاکھ 41 ہزار 500 قرض دار مستفید ہو رہے ہیں۔ اپنا گھر پروگرام کے تحت 86 ہزار 896 درخواستوں میں 511 ارب روپے کی فنانسنگ منظور ہوئی، جبکہ 15 ہزار 584 قرضوں کے ذریعے تقریباً 91 ارب روپے تقسیم کیے گئے۔ کمیٹی نے منظوری اور حقیقی ادائیگی کے درمیان فرق کم کرنے کے لیے مالیاتی اداروں اور متعلقہ ایجنسیوں کو رفتار بڑھانے کی ہدایت کی۔
پاکستان ایکسلریٹڈ وہیکل الیکٹریفکیشن، یعنی PAVE اسکیم کے تحت 21 ہزار 918 درخواستوں میں تقریباً 3.06 ارب روپے کی فنانسنگ منظور ہوئی۔ 5 ہزار 506 قرضوں کی مد میں 1.093 ارب روپے جاری کیے گئے اور 3 ہزار 263 الیکٹرک گاڑیاں صارفین کو فراہم کی جا چکی ہیں۔ وزیر خزانہ نے محفوظ اور رضامندی پر مبنی ڈیٹا شیئرنگ، بہتر کریڈٹ اسکورنگ اور قرض کی وصولی کے مؤثر نظام پر زور دیتے ہوئے کہا کہ ایس ایم ای اور زرعی شعبے میں ادائیگیوں کی رفتار مزید بڑھانے کی ضرورت ہے۔