تبلیسی: پاکستان کی مکسڈ مارشل آرٹس فائٹر ملیحہ علی نے آئی ایم ایم اے ایف ورلڈ چیمپئن شپ میں روس کی ویرونیکا ڈروزڈووا کو شکست دے کر کوارٹر فائنل میں جگہ بنالی ہے۔ ڈان کے مطابق 24 سالہ ملیحہ کا تعلق ہنزہ، گلگت بلتستان سے ہے اور انہوں نے جارجیا کے دارالحکومت تبلیسی میں فیدر ویٹ کی 65.8 کلوگرام کیٹیگری میں 19 سالہ روسی حریف کو اسپلٹ فیصلے سے ہرایا۔
ڈروزڈووا دو مرتبہ یورپی چیمپئن رہ چکی ہیں، جبکہ روس اس عالمی مقابلے میں 60 سے زیادہ کھلاڑیوں کے بڑے دستے کے ساتھ شریک ہے۔ ملیحہ نے ابتدائی راؤنڈ میں محتاط آغاز کے بعد حریف کو کیج کے قریب دباؤ میں رکھا اور صاف ضربیں لگائیں۔ دوسرے راؤنڈ میں انہوں نے ٹیک ڈاؤن کے بعد گراؤنڈ پوزیشن پر واضح برتری حاصل کی اور اوپر سے مؤثر حملے کیے۔
تیسرے راؤنڈ میں روسی فائٹر نے واپسی کی اور ملیحہ کو زمین پر کنٹرول کیا، لیکن پہلے دو راؤنڈز میں پاکستانی کھلاڑی کی برتری فیصلہ کن ثابت ہوئی۔ ججز نے اسپلٹ فیصلے کے ذریعے ملیحہ کو فاتح قرار دیا۔ مقابلے کے بعد ملیحہ نے کہا کہ انہوں نے کوچنگ کارنر کی ہدایات اور حریف کے لیے پہلے سے تیار کیے گئے گیم پلان پر عمل کیا۔
پاکستان ایم ایم اے فیڈریشن کے صدر عمر احمد کے مطابق انگولا میں رواں سال آئی ایم ایم اے ایف ورلڈ کپ کے دوران سامنے آنے والی کمزوریوں پر چھ ہفتے کے تربیتی کیمپ میں کام کیا گیا تھا۔ فیڈریشن نے جیو جِتسو اور گریپلنگ کے ایک بین الاقوامی کوچ کی خدمات بھی حاصل کیں۔ ملیحہ انگولا کے ورلڈ کپ میں چاندی کا تمغہ جیت چکی ہیں، جبکہ وہ ووشو چیمپئن اور قومی کک باکسنگ گولڈ میڈلسٹ بھی ہیں۔
ملیحہ کا اگلا مقابلہ میکسیکو کی اینڈریا گیبریلا گوزمان سالازار سے کوارٹر فائنل میں ہونا ہے۔ ان کی جڑواں بہن منیشا علی بھی اسی عالمی چیمپئن شپ میں شریک ہیں اور پولینڈ کی مارٹینا کاروک کے خلاف مقابلہ کریں گی۔ دونوں پاکستانی کھلاڑی عالمی ٹائٹل کی دوڑ میں شامل ہیں۔
