عالمی بینک کے بورڈ آف ایگزیکٹو ڈائریکٹرز نے سندھ پراپرٹی ریونیو انہانسمنٹ پروگرام (Sindh PREP) کیلئے 150 ملین ڈالر کی فنانسنگ منظور کر دی ہے۔ عالمی بینک کے مطابق پروگرام کا بنیادی مقصد سندھ میں شہری غیر منقولہ جائیداد پر ٹیکس کی وصولی کو بہتر بنانا، مقامی حکومتوں کی مالی صلاحیت بڑھانا اور شہری خدمات کی فراہمی کو مضبوط کرنا ہے۔
عالمی بینک نے بتایا کہ کراچی میں اس وقت سالانہ پراپرٹی ٹیکس وصولی تقریباً 8.5 ملین ڈالر ہے، جبکہ پروگرام کے تحت اسے بڑھا کر تقریباً 85 ملین ڈالر سالانہ تک لے جانے کا ہدف رکھا گیا ہے۔ اسی طرح ٹیکس ادائیگی کی شرح کو موجودہ تقریباً 20 فیصد سے 50 فیصد تک بڑھانے کی کوشش کی جائے گی۔ اس مقصد کیلئے بلنگ، ادائیگی اور شکایات کے ازالے سمیت ٹیکس انتظامیہ کو ڈیجیٹل نظام سے منسلک کرنے کی منصوبہ بندی کی گئی ہے۔
پروگرام سے کراچی کے 25 مقامی کونسل اداروں کو فائدہ پہنچنے کی توقع ہے۔ عالمی بینک کے مطابق ان علاقوں میں تقریباً 35 لاکھ 80 ہزار افراد رہتے ہیں۔ جمع ہونے والے شہری پراپرٹی ٹیکس کا تقریباً 70 فیصد حصہ متعلقہ مقامی کونسلوں میں بلدیاتی انفراسٹرکچر اور خدمات پر دوبارہ خرچ کرنے کا طریقہ تجویز کیا گیا ہے۔ ان کاموں میں نکاسی آب، سیوریج، سڑکیں، اسٹریٹ لائٹنگ، اسکولوں اور فائر اسٹیشنوں سمیت موسمیاتی خطرات کے مقابلے کی صلاحیت رکھنے والے شہری منصوبے شامل ہو سکتے ہیں۔
فنانسنگ کو نتائج سے منسلک رکھا جائے گا اور مقامی اداروں کی سالانہ کارکردگی ایک آزاد تصدیقی ادارے کے ذریعے جانچی جائے گی۔ پروگرام میں 40 ملین ڈالر کا انویسٹمنٹ پراجیکٹ فنانسنگ حصہ بھی شامل ہے، جس کے ذریعے سندھ کے دیگر شہری مراکز کی 20 مقامی کونسلوں میں پراپرٹی سروے اور ٹیکس انتظامیہ کی توسیع کی جائے گی۔ عالمی بینک کا اندازہ ہے کہ اس حصے سے بالواسطہ طور پر تقریباً 45 لاکھ افراد مستفید ہو سکتے ہیں۔
عالمی بینک کی پاکستان کیلئے کنٹری ڈائریکٹر بولورما امگابازار کے مطابق سندھ کی مقامی کونسلیں اپنی آمدن کیلئے بڑی حد تک صوبائی منتقلیوں پر منحصر ہیں۔ ادارے کا مؤقف ہے کہ مقامی سطح پر مستحکم آمدن شہروں کو طویل مدتی منصوبہ بندی، سرمایہ کاری اور بنیادی خدمات کی فراہمی کیلئے زیادہ مالی گنجائش دے سکتی ہے۔ پروگرام کے عملی نتائج کا انحصار ٹیکس نظام کی شفاف ڈیجیٹلائزیشن، ادائیگی کی شرح میں حقیقی اضافے اور جمع شدہ آمدن کو طے شدہ شہری خدمات پر مؤثر انداز میں خرچ کرنے پر ہوگا۔