کراچی: اسٹیٹ بینک آف پاکستان نے چھوٹے کاروباروں اور چھوٹے کسانوں تک رسمی قرض کی رسائی بڑھانے کے لیے نیا مالیاتی فریم ورک جاری کردیا ہے، جس کے تحت کمرشل بینک اہل مائیکروفنانس بینکوں اور نان بینک مالیاتی اداروں کو واسطہ بنا کر قرض فراہم کرسکیں گے۔ مرکزی بینک کے 28 اکتوبر کے سرکلر کے مطابق مخصوص اداروں کے ذریعے چھوٹے کاروباری قرض لینے والوں کے لیے انفرادی فنانسنگ کی زیادہ سے زیادہ حد 50 لاکھ روپے اور زرعی قرض لینے والوں کے لیے 20 لاکھ روپے ہوگی۔
نئے نظام میں بینک Participating Financial Institutions جبکہ مائیکروفنانس بینک، نان بینک مائیکروفنانس کمپنیاں اور دیگر اہل نان بینک فنانس کمپنیاں Agent Financial Institutions کے طور پر کام کرسکیں گی۔ واسطہ بننے والے ادارے قرض لینے والوں کی شناخت، کریڈٹ جانچ، دستاویزات، ادائیگیوں کی نگرانی اور ریکوری جیسے کام انجام دیں گے، جبکہ شریک بینک ان اداروں کے انتخاب، مالی حدود اور ضابطہ جاتی نگرانی کے ذمہ دار ہوں گے۔
فریم ورک میں واسطہ ادارے کی نوعیت کے مطابق قرض کی حد مختلف رکھی گئی ہے۔ نان بینک مائیکروفنانس کمپنی کے ذریعے چھوٹے کاروبار کے لیے قرض 10 لاکھ اور زرعی قرض پانچ لاکھ روپے تک محدود ہوگا، جبکہ مائیکروفنانس بینک یا دیگر اہل این بی ایف سی کے ذریعے یہی حدود بالترتیب 50 لاکھ اور 20 لاکھ روپے تک جاسکتی ہیں۔ اسٹیٹ بینک نے ایجنسی اور ہول سیل، دونوں ماڈلز کی اجازت دی ہے۔ ایجنسی ماڈل میں قرض شریک بینک کی کتابوں میں درج ہوگا، جبکہ ہول سیل انتظام میں قرض واسطہ ادارے کی بیلنس شیٹ پر بھی درج کیا جاسکتا ہے۔
اہل واسطہ اداروں کے لیے مالی اور انتظامی شرائط بھی مقرر کی گئی ہیں۔ انہیں کم از کم تین سال کا متعلقہ قرض دہی کا تجربہ، گزشتہ دو برس کے غیر مشروط آڈٹ شدہ مالی بیانات، مناسب کارپوریٹ گورننس اور اینٹی منی لانڈرنگ تقاضوں کی پابندی ثابت کرنا ہوگی۔ چھوٹے کاروبار اور زرعی قرضوں کے متعلقہ پورٹ فولیو میں غیر فعال قرضوں کی شرح پانچ فیصد سے زیادہ نہیں ہونی چاہیے۔ اگر فریم ورک کے تحت پورٹ فولیو میں غیر فعال قرضوں کی شرح 10 فیصد تک پہنچ جائے تو مزید فنانسنگ روکنے کی شق بھی رکھی گئی ہے۔ مرکزی بینک نے اس نظام کو وفاقی حکومت کی موجودہ رسک کوریج اسکیموں سے منسلک کیا ہے تاکہ چھوٹے اور نسبتاً کم خدمات یافتہ قرض لینے والوں تک مالی رسائی بڑھائی جاسکے۔
